आरोग्य विद्यापीठाच्या हिवाळी सत्राच्या दुसऱ्या टप्प्यातील परीक्षा सोमवारपासून!
MUHS Exam 2024 : पदव्युत्तर वैद्यकीय अभ्यासक्रमांच्या परीक्षांचाही यात समावेश आहे. या परीक्षांचे सविस्तर वेळापत्रक विद्यापीठाच्या वेबसाइटवर अपलोड केले असून विद्यार्थ्यांनी वेबसाइटला भेट देत आपल्या परीक्षांच्या वेळांची माहिती घ्यावी, असे आवाहन परीक्षा नियंत्रक डॉ. संदीप कडू यांनी केले आहे. महाराष्ट्र शासनाच्या विशेष अधिकारानुसार “महाराष्ट्र आरोग्य विज्ञान विद्यापीठ नियम, १९९८”ला अनुसरून हे इ.स. १९९८ साली स्थापन झाले.
महाराष्ट्र राज्य आरोग्य विज्ञान विद्यापीठाच्या (Maharashtra University of Health Sciences exam) हिवाळी सत्राच्या दुसऱ्या टप्प्यातील लेखी परीक्षा सोमवार, २ डिसेंबरपासून सुरू होणार आहेत. या परीक्षा तब्बल महिनाभर म्हणजे २ जानेवारीपर्यंत चालणार आहेत.
नाशिक येथे असलेल्या आरोग्य विज्ञान विद्यापीठाच्या हिवाळी सत्रातील पहिल्या टप्प्याच्या एमडीएस आणि पहिल्या वर्षाच्या बीडीएस या अभ्यासक्रमांच्या लेखी परीक्षा ०५ ऑक्टोबर ते ११ ऑक्टोबर या कालावधीत झाल्या होत्या. आता या हिवाळी सत्राच्या परीक्षांचा दुसरा टप्पा डिसेंबर महिन्यात सुरू होणार आहे.
०२ डिसेंबरपासून सुरू होणाऱ्या या परीक्षा राज्यातील १०० केंद्रांवर होणार असून त्यात पदवी आणि पदव्युत्तर अभ्यासक्रमांच्या परीक्षांचा समावेश आहे. हिवाळी सत्रातील दुसऱ्या टप्प्यात सुमारे ३० हजार विद्यार्थी परीक्षा देतील. त्यात एमबीबीएस, बीडीएस, बीएससी नर्सिंग अशा अभ्यासक्रमांच्या विद्यार्थ्यांचा समावेश आहे.
तसेच पदव्युत्तर वैद्यकीय अभ्यासक्रमांच्या परीक्षांचाही यात समावेश आहे. या परीक्षांचे सविस्तर वेळापत्रक विद्यापीठाच्या वेबसाइटवर अपलोड केले असून विद्यार्थ्यांनी वेबसाइटला भेट देत आपल्या परीक्षांच्या वेळांची माहिती घ्यावी, असे आवाहन परीक्षा नियंत्रक डॉ. संदीप कडू यांनी केले आहे.
महाराष्ट्र आरोग्य विज्ञान विद्यापीठ हे महाराष्ट्रातील आरोग्यविज्ञान व वैद्यकीविषयक विद्यापीठ आहे. याचे मुख्यालय नाशिक येथे आहे. महाराष्ट्र शासनाच्या विशेष अधिकारानुसार “महाराष्ट्र आरोग्य विज्ञान विद्यापीठ नियम, १९९८”ला अनुसरून हे इ.स. १९९८ साली स्थापन झाले. महाराष्ट्र राज्यामध्ये येणारी सर्व वैद्यकीय व निमवैद्यकीय अभ्यासक्रम या विद्यापीठाच्या अखत्यारीत येतात.
