महाराष्ट्रात ४९ नवीन मेडिकल कॉलेज!
New medical colleges in Maharashtra : राज्यात एकीकडे वैद्यकीय अभ्यासक्रमांची प्रवेश प्रक्रिया सुरू असताना दुसऱ्या बाजूला राज्यभरातील ४९ नवीन कॉलेजांच्या मान्यतेची प्रतीक्षा आहे. एमबीबीएस, नर्सिंग, निसर्गोपचार, फिजिओथेरपी अशा विविध अभ्यासक्रमांसाठी सुरू करण्यात येणाऱ्या या ४९ मेडिकल कॉलेजांच्या मान्यतेची फाइल मुख्यमंत्र्यांकडे सहीच्या प्रतीक्षेत आहे. मुख्यमंत्र्यांनी या कॉलेजांना मान्यता दिल्यास, राज्यातील वैद्यकीय शिक्षण घेऊ इच्छिणाऱ्या विद्यार्थ्यांसाठी जागा वाढून त्यांना दिलासा मिळणार आहे.
एकीकडे राज्यातील सरकारी मेडिकल कॉलेजांमध्ये प्रवेशासाठी मोजक्या जागा आहेत. तर दुसऱ्या बाजूला या ४९ खासगी कॉलेजांनी मान्यतेसाठी राज्य सरकारकडे अर्ज केला आहे. या सर्व कॉलेजांनी विविध तपासण्या पूर्ण केल्या आहेत. महाराष्ट्र आरोग्य विज्ञान विद्यापीठाच्या समितीसह वैद्यकीय शिक्षण व संशोधन संचालनालय यांनीही या सर्व कॉलेजांची पाहणी व तपासणी पूर्ण केली आहे.
या ४९ कॉलेजांमध्ये एमबीबीएसची तीन, एक दंतवैद्यक, १९ नर्सिंग, आठ पोस्ट बेसिक नर्सिंग, १४ आयुर्वेदिक आणि दोन होपिओपथी कॉलेजांचा समावेश आहे. उर्वरित दोन कॉलेजांपैकी एक फिजिओथेरपीसाठी आणि एक निसर्गोपचारासाठी आहे, अशी माहिती सूत्रांनी दिली.
यंदा ‘नीट’ परीक्षेत अनेक विद्यार्थ्यांना हाय-पर्सेंटाइल मिळाल्याने प्रवेशासाठी चांगलीच चुरस आहे. त्यामुळे बहुतांश मेडिकल कॉलेजांची कट-ऑफही यंदा चढी आहे. त्यामुळे विद्यार्थ्यांना एक तर खासगी कॉलेज निवडणे, शाखा बदलणे किंवा पुढल्या वर्षी पुन्हा परीक्षा देणे एवढेच पर्याय आहेत. राज्यात पहिल्या गुणवत्ता यादीची कट-ऑफ ६४२ आहे. गेल्या वर्षी ही कट-ऑफ ५८७ पर्सेंटाइल एवढी होती. यंदा खासगी कॉलेजांमध्येही ६०२ पर्सेंटाइलला पहिल्या यादीचे प्रवेश थांबले.
मान्यता गरजेची, चढ्या शुल्काचा प्रश्नविद्यार्थ्यांमध्ये प्रवेशाबाबत अनिश्चितता आहे. सर्व कॉलेजांमध्ये प्रवेश पूर्ण झाले, तर मोठ्या संख्येने विद्यार्थी वंचित राहतील. त्यासाठी या कॉलेजांना मान्यता मिळणे गरजेचे आहे, असे मत काही कॉलेजांच्या व्यवस्थापनांनी व्यक्त केले. मात्र, या खासगी कॉलेजांकडून वारेमाप शुल्क आकारले जाते. त्यामुळे या कॉलेजांमध्ये प्रवेश घेणे आणि वैद्यकीय शिक्षण पूर्ण करणे सर्वसामान्य विद्यार्थ्यांना परवडणार का, असा प्रश्न विद्यार्थी आणि पालक यांच्याकडून उपस्थित केला जात आहे.
