SNDT विद्यापीठातील मुलींचा ‘या’ अभ्यासक्रमाकडे सर्वाधिक ओढा!
SNDT Admission 2024 : नव्या राष्ट्रीय शिक्षण धोरणानुसार गृहविज्ञान विषयात क्लिनिकल न्युट्रिशन अँड डायटेटिक्ससारख्या व्यावसायिक अभ्यासक्रमांवर भर देण्यात आला आहे. त्यासोबत विद्यार्थिनींना रोजगार मिळावा, यासाठी विविध उद्योगांसोबत विद्यापीठाने करार केले आहेत. त्याचाही फायदा या अभ्यासक्रमाला झाला आहे. तसेच एनईपीमध्ये प्राथमिक शिक्षणाला महत्त्व दिल्याने बाल्यावस्थापूर्व काळजी आणि शिक्षण या विषयासाठीची मागणी वाढत असल्याचे निरीक्षण मानव्यविज्ञान शाखेच्या अधिष्ठाता डॉ. मेधा तापियावाला यांनी नोंदवले
आधुनिक जगात महिला एकामागोमाग एक विविध क्षेत्रे पादाक्रांत करत असताना गृहविज्ञानाच्या क्षेत्रातही त्या संपूर्ण अभ्यासाने उतरत असल्याचे स्पष्ट होत आहे. एसएनडीटी महिला विद्यापीठात अभ्यासक्रमासाठी प्रवेश घेणाऱ्या विद्यार्थिनींपैकी बहुतेकींनी होम सायन्स म्हणजेच गृहविज्ञान या विषयात पदव्युत्तर पदवी घेण्यात स्वारस्य दाखवले आहे. गेल्या तीन वर्षांत या अभ्यासक्रमाला प्रवेश घेणाऱ्या विद्यार्थिनींच्या संख्येत ३१४ टक्क्यांनी वाढ झाली आहे.
एसएनडीटी महिला विद्यापीठाच्या पाच कॅम्पसमध्ये सुमारे ७० हजार विद्यार्थिनी विविध अभ्यासक्रमांचे शिक्षण घेत आहेत. गेल्या तीन वर्षांच्या आकडेवारीवर नजर टाकली असता, सर्वाधिक म्हणजे ३१४ टक्के वाढ गृहविज्ञान विषयाच्या पदव्युत्तर अभ्यासक्रमासाठी झाली आहे. २०२२-२३ या वर्षी १०७ विद्यार्थिनींनी या अभ्यासक्रमाला प्रवेश घेतला होता. त्याच्या पुढील वर्षी १७६ आणि यंदा, म्हणजे २०२४-२५ या वर्षात ४४४ विद्यार्थिनींनी गृहविज्ञान विषयात पदव्युत्तर पदवी घेण्यास पसंती दिली आहे.
त्याशिवाय अर्थशास्त्रात पदव्युत्तर पदवी मिळवणाऱ्या विद्यार्थिनींच्या संख्येतही १५१ टक्के वाढ झाली आहे. या अभ्यासक्रमासाठी २०२२-२३मध्ये ६७ विद्यार्थिनींनी प्रवेश घेतला. २०२३-२४मध्ये ही संख्या वाढून १३० झाली, तर २०२४-२५मध्ये १६८ विद्यार्थिनी या अभ्यासक्रमासाठी दाखल झाल्या. तसेच बाल्यावस्थापूर्व काळजी आणि शिक्षण या विषयातील पदविकेसाठीही १८५ विद्यार्थिनींनी प्रवेश घेत शिक्षण सुरू केले आहे.
