CISF Bharti 2022 – तुम्ही बारावी पास आहात? ‘या’ पदांवर नोकरीची संधी

सध्याच्या काळात नोकरी मिळणं ही गोष्ट कठीण बनली आहे. सुशिक्षित तरुणांची संख्या आणि उपलब्ध नोकऱ्यांची संख्या हे व्यस्त प्रमाण चिंताजनक आहे. गेल्या दोन ते अडीच वर्षांत कोरोनामुळे  शिक्षण आणि रोजगारासह सर्व क्षेत्रांवर परिणाम झाला आहे. कोरोना काळात अनेकांना आपल्या नोकऱ्या गमवाव्या लागल्या. त्यामुळे बेरोजगारी अधिकच वाढली आहे. नुकतंच शिक्षण पूर्ण केलेले लाखो युवक नोकरीसाठी प्रयत्नशील आहेत. आपल्याला सरकारी नोकरी मिळावी, असं प्रत्येकाचं स्वप्न असतं; मात्र फार कमी जणांचं हे स्वप्न पूर्ण होताना दिसतं. सध्या केंद्रीय औद्योगिक सुरक्षा दल अर्थात सीआयएसएफची पदभरती प्रक्रिया सुरू आहे. सीआयएसएफमध्ये 540 पदं भरली जाणार आहेत. सरकारी नोकरीचं अनेकांचं स्वप्न या माध्यमातून पूर्ण होऊ शकतं.

केंद्रीय औद्योगिक सुरक्षा दलात हेड कॉन्स्टेबल (मंत्रिस्तरीय) आणि सहायक उपनिरीक्षक (स्टेनोग्राफर) ही पदं भरण्यासाठी अर्ज मागवले आहेत. या पदांसाठी इच्छुक आणि पात्र उमेदवार `सीआयएसएफ`च्या cifs.gov.in या अधिकृत वेबसाइटवर जाऊन अर्ज करू शकतात. या पदभरतीसाठीची अर्ज प्रक्रिया 26 सप्टेंबरपासून सुरू झाली आहे.